"МАРКАЗИЙ ОСИЁДА МИНТАҚАВИЙ ВА ХАЛҚАРО ХАМКОРЛИКНИ МУСТАҲКАМЛАШДА ЎЗБЕКИСТОННИНГ ТУТГАН ЎРНИ ВА РОЛИ" МАВЗУИДАГИ "ДАВРА СУҲБАТИ"
03.07.2018 | Ko`rilgan: 284

2018 йилнинг 2 июль куни Ўзбекистон Республикаси Олий Мажлиси Қонунчилик палатасининг Халқаро ишлар ва парламентлараро алоқалар қўмитаси ташаббуси билан “Марказий Осиёда минтақавий ва халқаро хамкорликни мустаҳкамлашда Ўзбекистоннинг тутган ўрни ва роли” мавзуисида “давра суҳбати” бўлиб ўтди.

Тадбир 2018 йилнинг 18 июнь куни қабул қилинган БМТ Бош Ассамблеясининг “Марказий Осиё минтақасида тинчлик, барқарорлик ва изчил тараққиётни таъминлаш бўйича минтақавий ва халқаро ҳамкорликни мустаҳкамлаш” резолюциясига бағишланди.

Унда Ўзбекистон Республикаси Ташқи ишлар вазири ўринбосари А.Абдувахитов, Олий Мажлис Қонунчилик палатаси Спикери ўринбосари С.Отамуратов, Олий Мажлис Қонунчилик палатаси депутатлари ҳамда мутасадди вазирлик ва идоралар вакиллари иштирок этдилар.

Тадбир Ўзбекистон Республикаси Олий Мажлиси Қонунчилик палатасининг Халқаро ишлар ва парламентлараро алоқалар қўмитаси, Ўзбекистон Республикаси Ташқи ишлар вазирлиги ҳамда “Тараққиёт стратегияси” маркази билан ҳамкорликда ташкил этилди.

Ўзбекистон ташаббуси ҳамда Марказий Осиёдаги қўшни мамлакатлар билан ҳамкорликда ишлаб чиқилган ушбу ҳужжат БМТга аъзо барча давлатлар томонидан бир овозда қўллаб-қувватланганлиги, резолюция Марказий Осиё давлатларининг минтақада тинчлик, барқарорлик ва изчил тараққиётни таъминлашга қаратилган интилишларини акс эттирганлиги, унинг минтақавий ва халқаро ҳамкорликни мустаҳкамлашдаги муҳим роли иштирокчилар томонидан эътироф этилди.

“Давра суҳбати” давомида шунингдек, резолюцияда қайд этилган Марказий Осиёдаги сув ва энергетика манбаларидан оқилона ва комплекс фойдаланиш соҳасидаги икки томонлама ва минтақавий ҳамкорликни ривожлантиришнинг аҳамияти, Орол денгизи қуришининг экологик ва ижтимоий-иқтисодий оқибатларини юмшатишга йўналтирилган минтақа давлатлари ҳатти-ҳаракатларини қўллаб-қувватланиши, минтақада замонавий транспорт ва транзит тизимини ташкил этиш, маърифат, фан, технологиялар, инновациялар, туризм, маданият, санъат ва спорт соҳаларидаги ҳамкорликни ривожлантириш муҳимлиги таъкидлаб ўтилди.